Skënderbeu nuk ka arritur të marrë më shumë se një fitore minimale ndaj skuadrës modeste nga Andorra, Sant Hulia, në ndeshjen e parë të vlefshme për turin e parë kualifikues të Ligës së Europës.
Askush nuk e kishte pritur një fitore minimale të Skënderbeut ndaj Sant Hulias, por tani një gjë e tillë është fakt dhe kualifikimi në turin tjetër të Ligës së Europës është i hapur. Korçarët goditën 2 herë shtyllën në pjesën e parë me anë të sulmuesit malazez Vujoviç, ndërkohë që në pjesën e dytë makthi i gjetjes së golit vazhdoi me një penallti të humbur nga Liridon Latifi. Por mesfushori e korrigjoi gabimin e tij në minutën e 69 teksa realizoi një supergol me goditje dënimi, gol që i dha fitoren 1-0 Skënderbeut.
Pas përfundimit të ndeshjes, ekipi i Sant Hulias u largua menjëherë nga Korça. Në orët e para të mëngjesit të sotëm është nisur drejt Andorrës nga aeroporti “Nënë Tereza”, raporton PanoramaSport.
Ndërkohë që pasi kanë dalë nga stadiumin “Skënderbeu”, ganezi i skuadrës Sant Hulia, Bafoe, që u bë protagonist një ditë më parë pasi kërkonte nuse në Shqipëri, i dhuroi përkthyeses bluzën e tij me numrin 21 dhe më pas u largua i mërzitur…ndoshta që nuk mundi të gjente nuse shqiptare.
